من طرف mr.samo الأربعاء 16 أبريل 2008, 5:48 pmليه دايما الحلال صعب ؟
وليه دايما الحرام سهل ؟
ليه دايما سهل انك تعرف واحده وتصاحبها وصعب انك تتجوزها ؟
بجد حاجه صعبة قوي .. عقدة !
يعني أنا شاب لي احاسيسي ومشاعيري وباحتاج الحب في المرحلة العمرية اللي أنا فيها دي .. ومش عايز اعرف واحده في علاقة صحوبية عشان حرام مش ده اللي بيقولوه ؟ طب إيدي على كتفك .. أنا كنت أقدر اتجوزها وما اتجوزتهاش !
الوضع الاقتصادي صعب .. وشروط الجواز صعبة .. شبكة ولازم تكون حاجه قد المقام وشقة ولازم تكون في حته كويسه وشغلانه لازم تدخلك مبلغ يعيش بنتنا عيشه كويسه ..
الوضع الاقتصادي زبالة من الآخر .. البلد منهوبة وفي بدل الأزمة سبعين ازمة .. طب والعمل ؟؟؟
قعدت افكر مع نفسي كده ..
نعمل إيه عشان أم الأزمة دي تتحل وكل واحد يتجوز البنت اللي بيحبها ؟ وكذلك العكس ؟
فكرت في انقلاب بالشباشب على الحكومة ! ونروح ماسبيرو ونعلن في القناة الخامسة ان الحكومة اتغيرت وجبنا حكومة تانيه هتعمل مستقبل للشاب عشان لما يخش على ابو العروسه يقوله أنا خريج تجارة وباشتغل في البنك الأهلي بخمستلاف جنيه ! بعد كده افتكرت فيلم بركان الغضب لما الجيش نزل الشارع عشان يدافع عن الحكومة .. فالعلمية كده مش هتنفع .. ومش هاينوبنا غير ضياع شباشبنا ويمكن شياع حياتنا !!
طب بعدين ! انا عايز فلوس دلوقتي أجيب شقة وشغلانه نضيفة .. هاعمل ايه والعملية مغيببه كده طب ؟؟ إيه ام الحيرة دي ياربي !!
فكرت في حاجه تانيه .. أسرق !! أعمل زي أحمد السقا .. البس اسود في اسود وأروح فيلا من فيلل الأغنيا اللي ناهبين في البلد وآخد معايا كشاف واحط فيه حجرين ماركة القط الاسود عشان ما يفصلش وألبس سلبس ابيض زي بتاع حصة الألعاب زمان واتسلل من النافذه وأسرقلي ييجي 15488893 مليون جنيه ولا حاجه كده من الخزنة وأطلع أجري والصبح اقوم فاتح سنترال ومحل موبيليا وفرن افرنجي وعربية كبدة في الموقف الجديد واعيش منهم ملك واتقدم بعدها بتلات ايام شهرين كده لابو البنت اللي هاتجوزها ويقولي يا مرحب يا إبني إحنا بنشتري راجل والله بس راجل عنده سنترال وفرن افرنجي وعربية كبده في الموقف أومال راجل ازاي .. هو الراجل يبقى راجل من غير كام باكو كده بيخشولوا كل شهر !! وفجأة ألاقي البوليس هاجم علي وانا عند أهل عروستي بيقولولي هات ياض الفلوس اللي سرقتها ! طبعا انا عشان منحوس البوليس ساب اليوم كله ومسكني اليوم اللي هاخطب فيه وعند أهلها .. طبعا الخطوبة هتتفشكل .. لإن الرجولة مش معناها ان يبقى عندك سنترال وفرن افرنجي وعربية كبده في الموقف وتبقى مسجون !
طب إيه العمل يا جدعااان .. اعمل إيه ؟؟ أنا المرادي مش هاعمل فيها عم الفاهم وهاسيبكوا تفتوا .. قل لي بالله عليك ماذا تفعل لو كنت مكاني ؟
